“O‘zstandart” agentligi Bosh direktori tashabbusi bilan sohada mehnat qilayotgan yosh mutaxassislarni qo‘llab-quvvatlash masalasiga alohida e’tibor qaratilmoqda.
Buning uchun tizim va tashkilotlardagi iqtidorli yoshlarni bir maqsad atrofida birlashtirish, ularga xorijiy tillarni o‘rgatish va madaniy-ma’rifiy uchrashuvlarni tizimli tashkil etish ijobiy samara beradi.
Shu maqsadda Andjon Sinov va sertifikatlashtirish markazi “Mahsulotlarni eksport qilishga ko‘maklashish buyurosi” mutaxassisi Dilnozaxon Boykishiyevaning tashabbusi va sayi-harakati bilan izlanuvchan, tashabbuskor va faol yoshlar bilan ishlash, kadrlar zaxirasini shakllantirish hamda yoshlar bo‘yicha siyosatini olib borish maqsadida, Andijon Mashinasozlik institutining “Metrologiya, standartlashtirish va sifatni boshqarish” yo‘nalishi talabalari tomonidan tashkil etilgan “Talabalar ilmiy uyushmasi” yosh olimlari bilan seminar-uchrashuv tashkil etildi.
O‘tkazilgan seminar uchrashuvning asosiy maqsadi yoshlarning bo‘sh vaqtlarini samarali o‘tkazish, ularning ilmiy izlanishlar bilan shug‘ullanishida sohaga oid dolzarb mavzularni tanlashga ko‘maklashish va yoshlar o‘rtasida ilmiy salohiyatni oshirishdan iborat bo‘ldi.
Uchrashuvda yoshlarga “Uzstandart” agentligi tomonidan respublikamizda ishlab chiqarilayotgan mahsulotlarning xafvsizligi, sifati va raqobatbardoshliligini ta’minlash yuzasidan amalga oshirilayotgan ishlar to‘g‘risida ma’lumotlar berildi.
Bunday uchrashuvlar kelgusida ham tizimli ravishda o‘tkazilishiga kelishib olindi.