Bir kuni Hazrati Abduxoliq G‘ijdivoniyga savol berdilar: “Dilning farog‘ati nimadan hosil bo‘lur?” Hoja buyurdilarki, dilning farog‘ati - uning tasfiti - ya’ni pokligidadur. Agar ul dilga dunyo molidan zarraye tama’ bo‘lmasa, dil farog‘atda bo‘lur.
Ma’rifatli bobomizning o‘gitlaridan shuni anglash mumkinki, insonning ma’naviyati, va kamoloti faqatgina ko‘ngil pokligi va uni ma’rifat nurlari bilan oziqlantirish orqaligina amalga oshirilar ekan.
“O‘zstandart” agentligi Bosh direktori tomonidan tasdiqlangan reja-dasturiga asosan, haftaning juma kunlari “Ma’naviyat soati” tashkil etib kelinmoqda. Navbatdagi uchrashuvga O‘zbekistonda xizmat ko‘rsatgan madaniyat xodimi, Yozuvchilar uyushmasi a’zosi, O‘zbekiston milliy teleradiokompaniyasining tajribali diktori Muslimbek Yo‘ldoshev taklif etildi.
Ma’naviyat soatida M.Yo‘ldoshev so‘zga chiqib, boshqa sohalar qatori “O‘zstandart” agentligi tizimidagi islohotlardan yaxshi xabardor ekanligini aytib, bunday uchrashuvlarni tashkil etilgani xodimlar orasida, umuman ish jarayonida ijodiy va ijobiy muhitning yaxshilanishiga olib kelishini ta’kidladi.
Xalqimiz ardog‘idagi tajribali suxandon M.Yo‘ldoshev xodimlarga o‘zining diktorlik faoliyati va so‘nggi yillarda yaratilgan she’rlari hamda o‘ngga yaqin yozgan kitoblari haqida gapirib berdi.
Uchrashuv davomida “O‘zstandart” agentligi xodimlari M.Yo‘ldoshevdan she’rlar tinglash bilan birga o‘zlarini qiziqtirgan ko‘plab savollariga javob oldilar.