Жорий йилнинг 12 апрел куни “Ўзстандарт” агентлигига Таиланд давлатининг Чулалонгкорн  университети, Халол  Илмий Марказидан профессор доктор Винай Дахлан рахбарлигида 60 кишидан иборат делегация ташриф буюрди. 

Шу куннинг ўзида “Ўзстандарт” агентлигининг катта мажлислар залида Таиланд делегацияси билан давра сухбати ўтказилди.

Ташриф буюрган барча мехмонларга “Ўзстандарт” агентлиги бош директори ўринбосари Ж.Н.Шукуров “Ўзстандарт” агентлигига ташриф буюргани учун ўз миннатдорчилигини билдирди. У ўз нутқида 2017-2021 йилларда Ўзбекистон Республикасини ривожлантиришнинг бешта устувор йўналишлари бўйича Ҳаракатлар стратегиясида иқтисодиётни ривожлантириш ва либераллаштириш масаласига алоҳида эътибор қаратилгани,  шу мақсадда, «Ўзстандарт» агентлиги томонидан ривожланаётган мамлакатларнинг сифат инфратузилмасининг ҳолати ва экспорт имкониятларини янада ошириш механизми чуқур ўрганилаётганлиги, аниқроқ қилиб айтганда, сайёҳларнинг эҳтиёжидан келиб чиқиб, сифатли ва қулай хизматларни кўрсатиш орқали туризм, озиқ-овқат, дори-дармон соҳаларида «Ҳалол» стандартлари жорий этиш масаласи муҳим аҳамият касб этишини гапириб ўтди.

Шундан сўнг мехмонларга “Ўзстандарт” агентлигида халол стандартлар сохасида олиб борилаётган ишлар бўйича презентация намойиш этилди. Ўз навбатида Таиланд вакиллари хам  Чулалонгкорн  университети, Халол  Илмий Маркази томонидан халол стандартлар бўйича олиб борилаётган ишлар юзасидан видеоролик ва презентация кўрсатилди.

Сухбат чоғида ушбу илмий марказ билан халол йўналишидаги лаборатория сохасида  кадрларни тайёрлаш, турли хил сохаларда халол стандартларини жорий қилиш, трейнинг ва ўқув семинарларини ўтказиш хамда хамкорлик битими имзолаш келишиб олинди.

Сухбат қизгин савол жавоблар ва дебатларга бой бўлди.

Учрашув сўнгида  Чулалонгкорн  университети, Халол  Илмий Марказидан профессор доктор Винай Дахлан  “Ўзстандарт” агентлиги рахбариятига илиқ қабул учун миннатдорчилик изҳор этиб, келажакда алоқаларни янада мустаҳкамлаш, Ўзбекистонда барча турдаги халол стандартларни жорий этиш ишларига тайёргарлик кўришлари учун Халол  Илмий Марказида хамма зарур шароитларни яратиб беришга тайёр эканлигини билдирди.